Puisi-Puisi Karya: Alfrits Ken Oroh*
ARS LONGA VITA BREVIS
Orang bilang...Badiang itu emas !
Orang bilang...Babicara itu sakti !
Orang bilang …Tatawa itu sehat !
Ato,orang bilang…Manangis itu sedih !
Kong apa ngana bilang tentang orang mati.
Apakah orang mati itu beking tako?…Ato kase tako!
Ato ngana ini mati-mati ayang!?
Badiang,bukang berarti mati !
Babicara,bukang beking mati !
Mar,bagera itu no tu beking maju !
...dapa nda qta pe suara taangka ka sorga !?
Manusia akan mati,mar
Seni tetap abadi…
SE BUKA KASADARAN
Hari itu …
Qta pigi untuk sementara waktu
bukang mo setinggal ato mo sebiar pa ngoni,
mar mo kase kesempatan buka ngoni pe pikiran
tanpa qta ngoni mandiri.
Deng qta pigi …
for mo buka kembali tu jalang
yang dulu torang lewat akang
so ta prop deng tadiam.
Nanti sebantar qta bale,
bawa bukti tentang eksistensi berkarya seni
itu yang lebe berarti dan abadi.
SUARA TOU’NAAS
( For Minahasan Poet’ )
Tenga malang
Qta blum dapa tatidor
Tainga samua torang pe cirita
Bagimana dulu torang Belanda
Sampe Orde Baru beking bodok
Dorang tulis ulang torang pe riwayat hidop
Skarang bekas tentara so berkuasa
Cuma segelintir orang tu mo batulis
Tu mo bakarya
For beking butul tong pe asal usul
Membangun Minahasa yang bermartabat;
Sastrawan harus angkat bicara
Harus batulis
Harus bakarya
HARUS !
Jadi Tou’naas…
*Penyair, Peteater, Pematung, Pelukis Sulut. Kini bekerja sebagai seorang guru di Bali.
0 comments:
Post a Comment